بافڵ جەلال تاڵەبانی، سەرۆكی یەكێتیی نیشتمانیی كوردستان و فایەق زێدان، سەرۆكی ئەنجومەنی باڵای دادوەریی عێراق لە بەغداد كۆبوونەوە.
لە كۆبوونەوەكەدا سەرۆك بافڵ پشتیوانیی یەكێتیی نیشتمانی كوردستانی بۆ بەردەوامیی گفتوگۆی بونیادنەرانەی نێوان هێز و لایەنە سیاسییەكان دووپاتكردەوە و جەختی لە تێپەڕاندنی بەربەست و ناكۆكییەكان كردەوە بە شێوەیەك دەستوور و یاسا بەركارەكان خاڵی یەكلاكەرەوەبن.
لە بەشێكیتری كۆبوونەوەكەدا پاراستنی سەقامگیریی ناوچەكە و سەروەریی یاسا گفتوگۆی لەبارەوەكرا و سەرۆك بافڵ وتی، “بە هەموو شێوەیەك پشتگیریی سەربەخۆیی دادگاكان دەكەین و دەبێت یاسا پارێزەری راستەقینەی مافی هەموو گەلانی عێراق بێت”.
