ئەندامێكی ئەنجومەنی نوێنەرانی عێراق رایدەگەیەنێت، بەغداد سەرەتای هەفتەی داهاتوودا 700 ملیار دینارەكە بۆ دابەشكردنی مووچەی مووچەخۆرانی هەرێمی كوردستان دەنێرێت و دەشڵێت، ناردنی ئەو پارەیە هاوشێوەی مانگەكانی رابردوو بە سێ گوژمە دەخرێتە سەر هەژماری بانكیی وەزارەتی دارایی هەرێم.
كاروان یاروەیس، ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، دەستكراوە بە رێكارە كارگێڕییەكان بۆ ناردنی دوایین بڕی 700 ملیار دینارەكە كە حكومەتی هەرێم و حكومەتی عێراق رێككەوتنیان لەسەركردبوو.
ئاماژەی بۆ ئەوەش كردووە، دوای تەواوبوونی رێككارە كارگێڕییەكان، چاوەڕواندەكرێت رۆژانی یەكشەممە و دووشەممەی هەفتەی داهاتوو، بەغداد دەست بە ناردنی ئەو بڕەپارەیە بۆ هەرێمی كوردستان بكات.
