ژنێکی کورد بە ناوی بەسیمە عەبدولڕەحمان، لە ریزبەندیی 100 ژنی کاریگەریی جیهانە بۆ ساڵی 2023.
دامەزراوەی پەخشی “بی بی سی”ـی بەریتانی، ناوی 100 ژنی کاریگەری جیهانی بۆ ساڵی 2023 بڵاوکردەوە و هاوشێوەی ساڵی رابردوو ئەمساڵیش ناوی ژنێکی کوردی تێدایە.
ئەو کەسایەتییە کاریگەرانە لە بوارە جیاوازەکان و ئاستی جیهاندا لە ژنانی سیاسیی و هونەرمەند و وەرزشەوان و چالاكوان و داکۆکیکار لە مافی کەمینەکان و ژنان دیاریکراون، لە نێویشیاندا ژنێکی کورد بە ناوی بەسیمە عەبدولڕەحمان هەیە، کە دامەزرێنەر و بەڕێوەبەری ئاژانسی “کەسک”ە بۆ ڕاوێژی بیناسازیی و بەکارهێنانی وزەی سەوز (نوێبوونەوە) لە عێراق.
لەبارەی بەسیمەوە بی بی سی دەڵێت: بەهۆی شەڕەوە زۆرێک لە شارۆچکەکانی عێراق وێران بوون، بەڵام کاتێک بەسیمە عەبدولڕەحمان دوای ماستەرەکەی لە ئەندازیاریی پێکهاتەیی گەڕایەوە، شێوازێکی جیاوازی بۆ هاوکاریی هێنایە کایەوە و کەسک-ی دامەزراند کە یەکەم هەنگاوە لە عێراقدا بەرەو درووستکردنی خانوو و باڵەخانەی دۆستی ژینگە و بەکارهێنانی خۆر وەک سەرچاوەی بەدەستهێنانی وزە.
دامەزراوەکە دەڵێت: بەسیمە بە شێوەیەک کار دەکات، کە بیناسازیی و بوارەکانی پڕاکتیزەکردنی کاریگەریی نەرێنییان لەسەر خۆشگوزەرانی و ژیانی نەوەکانی داهاتوو نەبێت.
ئەوە لەکاتێکدایە، ساڵی رابردوو بە هەمان شێوە دامەزراوەی بی بی سی ناوی 100 ژنی کاریگەری جیهانی بڵاوکردەوە کە لەنێویاندا 4 ژنی کورد هەبوون ئەوانیش (نیگار مارف سەرۆکی پەرستاران لە یەكەی سووتاوی نەخۆشخانەی سووتاوی و نەشتەرگەری جوانكاری لەشاری سلێمانی، رۆزا ساڵح سیاسەتمەدار، خەڵکی هەرێمی کوردستان و دانیشتووی سکۆتلەندا، زارا محەمەدی مامۆستای زمانی کوردی لە رۆژهەڵاتی کوردستان، هەروەها روئیا پیرەیی چالاکوان لە رۆژهەڵاتی کوردستان).
