وتەبێژی یەکێتی رایگەیاند، بەشێک لە هێزە عێراقییەکان هەوڵی کەمکردنەوەی هێزەکانی هاوپەیمانان و نەتەوە یەکگرتووەکان لە عێراق و هەرێمی کوردستان دەدەن ئەوە کارێکی مەترسیدارە.
سەعدی پیرە، وتەبێژی یەکێتیی نیشتمانیی کوردستان، لە کۆڕبەندی ئاشتی و ئاسایشی رۆژهەڵاتی ناوەڕاست بە دەنگی ئەمەریکای راگەیاند، بەشێک لە هێزە عێراقییەکان هەوڵی کەمکردنەوەی هێزەکانی هاوپەیمانان و نەتەوە یەکگرتووەکان لە عێراق و هەرێمی کوردستان دەدەن ئەوە کارێکی مەترسیدارە.
وتیشی، ئێمە هەتاکو ئێستا کێشەمان لەگەڵ وڵاتانی دراوسێ هەیە کە رۆژانە بۆردومان دەکەن، کێشەمان لەگەڵ شانە نوستووەکانی داعش هەیە لەناوخۆش کێشەمان هەیە بینیمان سەرۆکی پەرلەمانی عێراق دەرکرا، گرفتی مووچە و چەندین گرفتی دیکەمان هەیە بۆیە مانەوەی ئەو چەترە نێودەوڵەتییە گرەنتییە بۆ بەهێزی عێراق لەبەرامبەر نەیارەکانی.
لەبارەی پەیوەندییەکانی نێوان یەکێتی و پارتی، وتەبێژی یەکێتی رایگەیاند، هاتنی شاندی یەکێتی بە سەرۆکایەتی بافڵ تاڵەبانی سەرۆکی یەکێتیی نیشتمانیی کوردستان و پێشوازیکردنی لەلایەن نێچیرڤان بارزانی سەرۆکی هەرێمی کوردستانەوە هەنگاوێکی دیکەیە بۆ خاوکردنەوەی گرژییەکان و چارەسەرکردنی گرفتەکان.
