وتەبێژی جێگری سەرۆك وەزیرانی هەرێم رایدەگەیەنێت، گفتوگۆكانی نێوان هەرێم و بەغداد لەسەر مووچە و نەوت بەردەوامن و شاندێكی هەرێم سەردانی بەغداد دەكات بۆ گفتوگۆكردن لەسەر هەمواركردنەوەی یاسای بودجە و دواكەوتنی مووچەی مووچەخۆران.
سەمیر هەورامی وتەبێژی جێگری سەرۆك وەزیرانی هەرێم لە لێدوانێكیدا رایگەیاند، لە چەند رۆژی رابردوودا شاندێكی وەزارەتی نەوتی عێراق سەردانی هەرێمی كوردستانی كرد بۆ گفتوگۆ كردن لەسەر دەستپێكردنەوەی هەناردەی نەوتی هەرێم و رێككەوتن و تێچووی كۆمپانیا نەوتییەكان كە لە هەرێمی كوردستان كاردەكەن.
راشیگەیاند، شاندێكی هەرێم بۆ هەمواركردنەوەی یاسای بودجە و مووچە نەدراوەكان سەردانی بەغداد دەكات بە جۆرێك كە هاوشێوەی پارێزگاكانی ناوەڕاست و باشووری عێراق مووچەی مووچەخۆرانی هەرێم خەرجبكرێت و پرسی مووچە لەسەرجەم پرسەكانی دیكە جیابكرێتەوە.
وتەبێژی جێگری سەرۆك وەزیرانی هەرێم جەختیشیكردەوە، گفتوگۆكانی نێوان هەرێم و بەغداد لەسەر مووچە و نەوت بەردەوامن.
