سیناتۆرێکی کۆمارییەکان لە ویلایەتی کارۆلینای باشوور، کشانەوەی خۆی لە کێبڕکێی هەڵبژاردنی سەرۆکایەتیی ئەمریکا ڕاگەیاند.
تیم سکۆت، کاندیدی هەڵبژاردنی سەرۆکایەتیی ئەمریکا و سیناتۆری کۆمارییەکان، لە چاوپێکەوتنێکدا لە فۆکس نیوز وتی، “کاتێک دەگەڕێمەوە بۆ ویلایەتی ئایۆوا بانگەشەی هەڵبژاردنەکەم ڕادەگرم و لە کاندیدبوون بۆ پۆستی سەرۆکایەتیی ئەمریکا دەکشێمەوە”.
ئەوەش خستەڕوو، “پێموایە ئەو دەنگدەرانەی کە بە منیان دەوت ئێستا کاتی خۆ کاندید کردن نییە زۆر روون و راشکاو بوون لەگەڵم”.
بڕیارە لە تشرینی دووەمی 2024 هەڵبژاردنی سەرۆکایەتیی ئەمریکا بەڕێوەبچێت و تێیدا دۆناڵد ترەمپ، سەرۆکی پێشووی ئەمریکا، ڕۆن دیسانتیس، پارێزگاری فلۆریدا، نیکی هێلی، باڵیۆزی پێشووی ئەمریکا لە نەتەوە یەکگرتووەکان و جۆ بایدن سەرۆکی ئەمریکا و چەند کەسێکی دیکە خۆیان کاندید کردووە بۆ ئەو پۆستە.
