هەنگوین یەکێکە لە خواردنە سروشتییەکان کە بەکارهێنانی چەندین سوودی تەندروستی بە جەستە دەگەیەنێت، بەڵام زیادەڕەویکردن لە خواردنیدا دەشێت زیانەکانی زیاتر بکات.
پزیشکێکی نەخۆشییە هەناوییەکان دەڵێت، خواردنی هەنگوین تەنها ئەو کاتە سوودی تەندروستی هەیە کە بەشێوەی تەندروست و پێویست بخورێت و لە پلەی گەرمای سەروو 40 پلەی سیلیزی دانەنرێت چونکە بەها خۆراکییەکانی لەدەستدەدات.
ئاشکراشیدەکات، بۆ کەسێکی پێگەیشتوو لە رۆژێکدا نابێت لە 50- 100 گرام هەنگوین زیاتر بخوات، چونکە بڕێکی زۆر کاربۆهیدراتی خێرای تێدایە و بارگرانی لەسەر پەنکریاس و گورچیلەکان دروستدەکات.
هاوکات داواشدەکات، ئەو کەسانەی نەخۆشی شەکرەیان هەیە بە هەردوو جۆرەکەوە، لەگەڵ ئەو کەسانەی قەڵەون خۆیان لە خواردنی هەنگوین بپارێزن.
