دەستەی کەشناسیی و بومەلەرزەزانیی عێراق رایگەیاند، لە مانگی ئەیلولدا لە سنووری پارێزگای سلێمانی 15 و لە سنووری هەولێر حەوت بومەلەرزە روویانداوە.
لە راگەیەندراوێکی دەستەی کەشناسیی و بومەلەرزەزانیی عێراقدا هاتووە، “مانگی رابردوو 36 بومەلەرزە لەناو خاکی عێراق تۆمارکراون، گوڕەکانیان لە نێوان (1-5.2) پلە بە پێوەری رێختەر بوون لە قووڵی (6-29) کیلۆمەتر.
ئاشکراشیکرد، زۆرترینی چالاکی بومەلەرزە لە سنووری قەزای چەمچەماڵی سەر بە پارێزگای سلێمانی بووە، 15 بومەلەرزە تێیدا روویداوە، دواتریش پارێزگای هەولێر بووە کە حەوت بومەلەرزە روویانداوە، بومەلەرزەیەکیش لە سنووری کەرکوک و دیالە روویداوە.
