قوباد تاڵەبانی رایدەگەیەنێت، لە جیهاندا سەركردە لە نمونەی سەرۆک مام جەلال زۆر کەم و دەگمەنن و دەشڵێت، مام چەتری کۆکەرەوەی ناكۆكەكان و حەکیمی چارەسەر و ئاشتەواییان بوو.
قوباد تاڵەبانی لە ساڵیادی كۆچی دوایی سەرۆك مام جەلال پەیامێكی بڵاوكردەوە و رایگەیاند، لاپەڕەکانی مێژووی هەر گەلێک پڕە لە چیرۆک و بەسەرهاتی ئەو سەرۆک و سەرکردە و رابەرانەی کە سەرکەوتن و دەستکەوتی گەورەیان بۆ گەلەکەیان بەدیهێناوە، بەڵام نەک هەر لە مێژووی گەلێکدا بەڵکو لە مێژووی جیهانیشدا ژمارەی ئەو سەرۆک و سەرکردانەی لە نمونەی سەرۆک مام جەلال-ن زۆر کەم و دەگمەنن کە ئەوەندە بە شکۆ و مەزن بن، تەنانەت لای نەیارەکانیشیان رێزلێگیراوبن و دوای خۆیان ببنە قوتابخانەیەک بۆ سیاسەت و نەوە لە دوای نەوە باس لە گەورەیی و خەبات و سیاسەت و حەکیمییان بکرێت.
قوباد تاڵەبانی دەشڵێت، “راستە سەرۆک مام جەلال دامەزرێنەر و سەرۆک و رابەری یەکێتیی نیشتمانیی کوردستان بوو، بەڵام ئەو هەر موڵکی یەکێتی نەبووە بەڵکو هی هەموو کوردە”.
ئەوەش دەڵێت، راستە سەرۆک مام جەلال زیاتر لە ٦٠ ساڵ لەپێناو کورددا خەباتی کرد، بەڵام بەهۆی سیاسەتی حەکیمانەی لە چارەسەرکردنی کێشەی عێراقییەکان، ئەمڕۆ هەموو عێراقییەکان بە موڵکی خۆیانی دەزانن.
“راستە سەرۆک مام جەلال سەرۆکێکی کورد و سەرۆک کۆماری عێراق بوو، بەڵام بەهۆی خەبات و تێکۆشانی بۆ داکۆکیکردن لە ئازادی و هەوڵەکانی لەپێناو دیموکراسیدا، لای ئازادیخوازان و دیموکراسیخوازانی جیهانیش سەرۆکێکی رێزلێگیراوە” لە بەشێكی دیكەی پەیامەكەی قوباد تاڵەبانی-دا هاتووە.
ئاماژەشدەدات، مام چەتری کۆکەرەوەی ئەو کەس و لایەنانە بوو کە ناکۆکی و گرفتیان هەبوو و حەکیمی چارەسەر و ئاشتەواییان بوو لەپێناو بەرجەستە کردنی ئارامی و بەرژەوەندیی گشتیدا.
قوباد تاڵەبانی دووپاتیشیدەكاتەوە، تا رۆژان و ساڵان تێپەڕدەبن زیاتر درک بە ئازاری غیابی مام دەکەین، تا قەیرانەکان و ململانێ و ناکۆکییە سیاسییەکان لە کوردستان و عێراق قوڵتر دەبنەوە، زیاتر لە حکیمەت و سیاسەتی مام تێدەگەین کە چۆن بەرپرسیارانە و دووربینانە ئیدارەی ناکۆکییەکانی کردوە و رێگربووە لەوەی قوڵبوونەوەی ناکۆکی نێوان دوو لایەن و چەند لایەنی سیاسی ژیان و داهاتووی خەڵک بخاتە مەترسییەوە. لە خۆڕا نەبوو کە لە لوتکەی بێهیواییدا هەمیشە مام جەلال تروسکایی هیوایەک بوو بۆ چارەسەرکردنی کێشەکان.
“لە یادی شەش ساڵەی کۆچی دواییدا باشترین رێز و وەفا بۆ سەرۆک مام جەلال، نوێکردنەوەی بەڵێنی بەردەوامبوونە لەسەر رێبازەکەی، باشترین وەفا ئەوەیە لە ڕێ و رێبازەکەی تێبگەین و کاری لەسەر بکەین. بۆ ئەمساڵیش بەستنی سەرکەوتووانەی پێنجەمین کۆنگرەی یەکێتی، باشترین وەفا و پاداشتی یەکێتییەکان بوو بۆ روحی بەرزی سەرۆک مام جەلال” وەك ئەوەی لە بەشێكی دیكەی پەیامەكەدا هاتووە.
قوباد تاڵەبانی لە كۆتاییشدا دەڵێت، یادت بۆ هەمیشە لە دڵماندایە و رێبازیشت بۆ هەتا هەتایە لە هزرماندایە.
