بافڵ جەلال تاڵەبانی نیگەرانی بۆ كۆچی دوایی سكرتێری پێشووتری حزبی شیوعی دەردەبرێت و دەڵێت، نموونەی باڵا و سەربەرزی کوردایەتی و شۆڕشگێڕی بوو.
بافڵ جەلال تاڵەبانی سەرۆکی یەکێتیی نیشتمانیی کوردستان لە پەیامێكدا ڕایگەیاند، کۆچی دوایی تێكۆشەری دێرین و سكرتێری پێشووی حزبی شیوعی كوردستان و یەکێك لە ڕەمزە دیارەکانی حزبی شیوعی عێراق هاوڕێ (كەریم ئەحمەد) نیگەران و خەمباری کردم.
بافڵ جەلال تاڵەبانی وتیشی، “مامۆستا کەریم ئەحمەد لە نەوەی یەکەمی ڕێبوارەکانی ڕێگای کوردایەتی بوو کە ھەمیشە بە ھەڵوێست و بیری دیموکراتی و نیشتمانی دەناسرایەوە. وەک سەرۆک مام جەلال لە وەسفیدا دەیفەرموو (مامۆستا کەریم تێكۆشەرێكی خاكی، ڕەشۆكی، جەماهیری بوو. ئێمەمانانی خوێندكاری خۆی، وەك خۆی تەماشادەكرد و ڕێزی لێدەگرتین. ھەتا سەریش ھەر بەو جۆرە جوامێری و سەربەرزییە مایەوە لە دڵی ئێمەماناندا)”.
لە بەشێكی دیكەی پەیامەكەدا هاتووە، کۆچی دوایی کەسایەتییەکی وەک مامۆستا کەریم ئەحمەد کە نموونەی باڵا و سەربەرزی کوردایەتی و شۆڕشگێڕی بوو، خەسارەتێکی گەورەیەوە و جێ و پێگەکەی پڕناکرێتەوە، بەڵام ژیان و ناوبانگی جوامێرانەی لە مێژووی گەلەکەمان بە شانازیی و بەزیندوویی دەمێنێتەوە و دەبێتە وانەیەکیش بۆ پاکی و سەرڕاستی لەگەڵ نەتەوە و ئەو بیروباوەڕەی خەباتی بۆ دەکەین.
سەرۆكی یەكێتی لە كۆتاییشدا دووپاتیكردەوە، بۆ لەدەستدانی ئەم کەڵە تێکۆشەرە، پرسە و سەرەخۆشی خۆمان بە کەسوکار و خزمان و ھاوڕێیانی ڕادەگەیەنین و، ڕۆحی بۆ ھەمیشە شادبێت و سەبووری و ئارامیش بەھەموو لایەک ببەخشێت.
