ئەندامێكی ئەنجومەنی نوێنەرانی عێراق رایدەگەیەنێت، ئەو قەرزە 700 ملیار دینارییەی بۆ مووچەی فەرمانبەرانی هەرێم رەوانەدەكرێت بۆ مانگەكانی دواتر لەگەڵ دابەشكردنی مووچەی فەرمانبەرانی عێراقدا پارەكە دەخرێتە سەر هەژماری وەزارەتی دارایی هەرێم و دەشڵێت، “پێویستە لە ماوەی ئەم سێ مانگەدا حكومەتی هەرێم كێشەكانی لەگەڵ حكومەتی عێراق چارەسەربكات”.
غەریب ئەحمەد ئەندامی ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، بەپێی ئەو رێككەوتنەی لە نێوان هەرێم و بەغداد كراوە ئەو 700 ملیار دینارەی بۆ ماوەی سێ مانگ دەدرێتە هەرێم لەگەڵ دەستپێكردنی دابەشكردنی مووچەی فەرمانبەرانی عێراقدا پارەكە دەخرێتە سەر هەژماری وەزارەتی دارایی هەرێم.
ئاماژەی بۆ ئەوەش كرد، ئەو رێوشوێنانەی كە بۆ پێدانی قەرزەكە لەم مانگەدا دەگیرێتەبەر بۆ مانگەكانی دواتر پێویست نابێت، بەڵام دەبێت هەرێم لە ماوەی ئەم سێ مانگەدا كێشەكانی لەگەڵ بەغداد چارەسەربكات.
