جێگری سەرۆكی رێكخراوی یەكێتیی مامۆستایانی كوردستان رایدەگەیەنێت، زۆرینەی مامۆستایان سوورن لەسەر هەڵوێستی خۆیان كە بەیەك مووچە ناچنەوە هۆڵەكانی خوێندن و دەشڵێت، “بەپێی رێنماییەكان لە مووچەی مانگی 7 و 8 دەرماڵەی هاتوچۆ لە مامۆستایان دەبڕدرێت”.
عەتا ئەحمەد جێگری سەرۆكی رێكخراوی یەكێتیی مامۆستایانی كوردستان لە لێدوانێكدا بە تۆڕی میدیایی ئێستای راگەیاند، بۆ دابەشكردنی مووچەی مانگی تەمموز چاوەڕوانی گەیشتنی پارەكەی بەغداد دەكرێت و تائێستا مامۆستایانی ناڕازیی سوورن لەسەر هەڵوێستەكەیان كە بە یەك مووچە بایكۆت ناشكێنن و لە هەمان كاتدا مامۆستایانی وانەبێژیش ئامادەنین بچنەوە هۆڵەكانی خوێندن و داوای دامەزراندن دەكەن.
ئاماژەی بۆ ئەوەش كرد، بەپێی رێنماییەكان بۆ مووچەی مانگی 7 و 8 دەرماڵەی هاتوچۆی مامۆستایان دەبڕدرێت و لەگەڵ دەستپێكردنەوەی پڕۆسەی خوێندن ئەو دەرماڵەیە خەرجدەكرێت كە بەپێی شوێنی جوگرافی دەرماڵەی هاتوچۆ بۆ مامۆستایان خەرجدەكرێت.
