بەڕێوەبەری گشتیی تەندروستیی هەولێر ئاشکرایکرد، 221 حاڵەتی پشتڕاستکراوەی کۆلێرایان لە شارەکەدا تۆمارکردووە، ئەمە سەرەڕای ئەو حاڵەتانەی پشتراستنەکراونەتەوە بەپێی پشکنین.
دکتۆر دلۆڤان محەمەد بەڕێوەبەری گشتیی تەندروستیی هەولێر لە کۆنگرەیەکی رۆژنامەوایدا ئاشکرایکرد، “تائێستا 221 حاڵەتی تووشبوون بە کۆلێرامان لە شارەکەدا تۆمارکردووە کە سەرجەمیان بەپێی پشکنینە پزیشکییەکان پشڕاستکراونەتەوە، ئەمە سەرەڕای ئەوەی بەردەوام حاڵەتەکان لە زیادبووندان”.
ئاماژەی بەوەشکرد، “کاتێک ژمارەی تووشبوونەکان زیاتر دەبن، کارەکان تەنها لە کەرتی تەندروستیدا سنوردار نابن، بەڵکو سێکتەری دیکەش دەگرێتەوە” ئاماژەی بەوەشکرد، بەڕێوەبەرایەتی ئاو-مان لە تەشەنەسەندنی ئەم پەتایە ئاگادارکردووەتەوە، هەروەها پارێزگای هەولێر ئاگادارکراوەتەوە، بۆ جێبەجێکردنی رێکاری پێویست.
ئێستا لە هەرێمی کوردستان پەتای کۆلێرا بڵاوە و پێشتریش وەزارەتی تەندروستی رایگەیاند، لەسەرجەم پارێزگا و ئیدارە سەربەخۆکانی هەرێمی کوردستان حاڵەتەکانی کۆلێرا تۆمارکراون.
