باڵیۆزی بەریتانیا لە عێراق، سەرکۆنەی هێرشەکەی رۆژی دووشەممەی رابردوو دەکات کە کرایە سەر فڕۆکەخانەی کشتوکاڵیی عەربەت و جەخت پشتگیرییکردنی ئاسایشی عێراق دەکاتەوە.
لە پەیامێکدا ستیڤن هیچن باڵیۆزی بەریتانیا لە بەغداد رایگەیاند، “بەریتانیا ئیدانەی هێرشەکەی 18ی ئەیلول لە فڕۆکەخانەی عەربەت لە هەرێمی کوردستان دەکات وە هەروەها پرسە و سەرەخۆشی خۆمان ئاڕاستەی کەسوکاری قوربانیان و زیانلێکەوتووەکان دەکەین”.
جەختیکردووەتەوە، “ئێمە پابەندین بە پشتگیریکردنی ئاسایش و سەروەری و یەکپارچەیی خاکی عێراق و باشترکردنی ژینگەی ئاسایشی ناوچەکە”.
لە رۆژی 18ی ئەم مانگە بە فڕۆکەی بێ فڕۆکەوان هێرش کرایەسەر فڕۆکەخانەی کشتوکاڵیی عەربەت و بەهۆیەوە سێ پێشمەرگەی دژە تیرۆر شەهیدبوون و سیانی دیکەش برینداربوون.
