ئەندامێکی فراکسیۆنی یەکێتیی لە ئەنجومەنی نوێنەرانی عێراق رایگەیاند، هەرگیز نەوەی نوێ بۆچوونی لەگەڵ فراکسیۆنە کوردییەکاندا نەبووە لە پرسە هەستیارەکاندا، تەنانەت ئەمڕۆ کە دەنگ لەسەر پرۆژە یاسای بەپارێزگابوونی هەڵەبجە دەدرێت تا ئێستا یەک ئەندامیان نەهاتووەتە هۆڵی کۆبوونەوەکان.
چرۆ حەمەشەریف ئەندامی فراکسیۆنی یەکێتیی لە ئەنجومەنی نوێنەرانی عێراق بە تۆڕی میدیایی ئێستای راگەیاند، “ئێمە وەک فراکسیۆنی یەکێتیی زۆرینەمان بە جلی کوردییەوە هاتووین بۆ دەنگدان بە پرۆژەیاسای بەپارێزگابوونی هەڵەبجە، بەڵام فراکسیۆنی نەوەی نوێ تا ئێستا یەک ئەندامیان نەهاتووەتە هۆڵەکە، تەنانەت جاری رابردووش کە دانیشتنەکە دواخرا سەرۆکی فراکسیۆنەکەشیان ئامادەنەبوو”.
ئاماژەی بەوەشکرد، “چ لە پرسی بەپارێزگابوونی هەڵەبجە، چ لەپرسی ناردنی مووچەی فەرمانبەرانی هەرێم نەوەی نوێ رای لەگەڵ رای لایەن کوردییەکان نەبووە، هەرگیز لە پرسە هەستیارەکاندا لەگەڵ فراکسیۆنە کوردییەکان نەبوون و هەمیشە لایەنەکانی دیکە بۆچوونیان چۆن بووبێت بۆچوونی ئەوان پێچەوانەکەی بووە”.
بە وتەی ئەو ئەندامەی ئەنجومەنی نوێنەران، لەگەڵ فراکسیۆنە کوردییەکانی دیکە گفتوگۆیان لەگەڵ فراکسیۆنە جیاوازەکانی ئەنجومەنی نوێنەران کردووە و لەو باوەڕەدان لایەنە عەرەبییەکان لاریان لە بەپارێزگابوونی هەڵەبجە نییە.
