لەدوای ئەوەی لە شەوی رابردووەوە لە بەشێک لە لاپەڕەکانی تۆڕە کۆمەڵایەتییەکان وێنەی کچێكی نیقاب پۆش بڵاوکرایەوە و دەنگۆی ئەوە بڵاوکرایەوە کە لە سلێمانی کوژراوە، تۆڕی میدیایی ئێستا راستکردنەوەی بۆ وێنە بڵاوکراوەکە کرد.
بەپێی ئەو بەدواداچوونەی تۆڕی میدیایی ئێستا کردوویەتی، ئەو وێنانەی لە شەوی رابردووەوە بڵاوکراونەتەوە و دەوترا کچێكی خەڵکی رۆژئاوای کوردستانە دوورن لە راستییەوە، وێنەکە بۆ کچێکی میسری دانیشتووی قاهیرە دەگەڕێتەوە بە ناوی (ئایە عومەر محەمەد).
هەر بەپێی بەدواداچوونەکان، ئەو کچە میسرییە بلۆگەرە و کاری فرۆشتنی جلوبەرگ دەکات و لاپەڕەی لە تۆڕە کۆمەڵایەتییەکان هەیە.
پێشتر سەرکەوت ئەحمەد وتەبێژی پۆلیسی سلێمانی دەنگۆی کوژرانی کچێکی لە سلێمانی رەتکردبووەوە و ئاشکرایکردبوو، “بڵاوکردنەوەی ئەو دەنگۆیانە بۆ ناشرینکردنی سلێمانییە”.
