قوباد تاڵەبانی جێگری سەرۆکی حکومەتی هەرێم پەیامێک ئاڕاستەی کۆنفڕانسی نیشتمانیی ئۆتیزم دەکات لە سلێمانی و دەڵێت “بە هەموو توانامەوە هەوڵدەدەم کەمێک لە بارگرانی خێزانەکان کەمبکەمەوە”.
جێگری سەرۆکی حکومەتی هەرێم لە پەیاماکەیدا رایگەیاند، “بەپێی ئامار و داتاکان رێژەی ئۆتیزم لە هەرێمی کوردستان لە بەرزبوونەوەدایە و بەپێی چەند توێژینەوەیەکی زانستی باس لەوە دەکرێت ئەگەر رێوشوێنی پێویست نەگیرێتەبەر رێژەی ئۆتیزم بۆ ئاستێکی مەترسیدار بەرزدەبێتەوە”.
ئاشکراشیکرد، “لەسەر ئاستی هەرێم و عێراق لەگەڵ لایەنی پەیوەندیدار لەسەر هێڵم بۆئەوەی لە رێگەی پەسەندکردنی یاسای نوێوە یان هەموارکردنەوەی یاسا، کەمێک لە کێشە و بارگرانی خێزانەکانی گیرۆدەی ئۆتیزم کەمبکرێتەوە”.
دەشڵیت، “بەهەموو توانامەوە هەوڵدەدەم کەمێک لە بارگرانی خێزانەکان و بەتایبەت ئەو دایکانە کەمبکەمەوە کە قوربانیی یەکەمن و ئازار دەچێژن”.
کۆنفڕانسی نیشتمانیی ئۆتیزم لەلایەن دامەزراوەی مێرگ بە هەماهەنگی قوباد تاڵەبانی جێگری سەرۆکی حکومەتی هەرێم بۆ ماوەی دوو رۆژ 13 و 14 مانگ لە سلێمانی بەڕێوەدەچێت، ئامانج لە کۆنفڕانسەکە هۆشیارکردنەوە و داکۆکیکردنە لە مافەکانی خاوەن پێداویستییە تایبەتەکان.
