رۆژنامەنووس و چاودێرێکی سیاسی سەبارەت بە نامەکەی سەرۆکی حکومەت بۆ سەرۆکی ئەمریکا رایگەیاند “دەبوو روو لە خەڵكی هەرێم قسەیەكی نوێ، جوڵەیەكی نوێی بكردایە”
کەمال رەئوف رۆژنامەنووس و چاودێری سیاسی لە وتارێکدا رایگەیاند، “باشتر بوو سەرۆكی حكومەت پێش ئەوەی نامە بۆ جۆ بایدن سەرۆکی ئەمریکا و هەركەسێکی تر بنێرێت و داوای هاوكاری و دەستگیرۆی بكات، دەبوو روو لە خەڵكی هەرێم قسەیەكی نوێ، جوڵەیەكی نوێی بكردایە”.
لە بەشێکی دیکەی وتارەکەیدا نووسیوویەتی، “سەرۆكی حكومەت دەبوو، پێش ئەوەی داوای دەستی دۆستایەتی و هاوكاری بۆ دەرەوە راكێشێت، پێویست بوو ئاوڕێكی لە خەڵكی هەرێم و هاوپەیمانە كوردییەكانی و لایەنەكانی بەشدارو شەریكی حكومەتەكەی بدایەتەوە، من تێناگەم بۆ سەركردەكانی كورد هەرگیز لایان شەرم نەبووە، داوای هاوكاری لە غەیرە كورد بكەن”.
دەشڵێت: “بەراستی سەیرە سەری زمان و بنی زمانیان باسی تەبایی و ئاشتی و لەخۆبردەییە، كەچی لە 30 ساڵی حكومڕانیان بەردەوام لە دۆخی شەڕدا بوون و ئێستاش لە دۆخێكی وەك ئەمڕۆدا ئەوەی نابینرێت تەبایی، ئاشتی، پێكەوە ژیان و لێبوردەییە، ئەوەشی زۆرە كینە و پیلانە لە دژی یەكتری و پشتكردنە خەڵكە بە لەبەرچاو نەگرتنی قوتی ژیانیشیانەوە”.
