هەناردەی نەوتی عێراق بۆ ئەمریكا لە ماوەی شەش مانگی ساڵی 2023دا گەیشتووەتە نزیكەی 65 ملیۆن بەرمیل.
بەپێی ئیدارەی زانیاریی وزەی ئەمریكا، هەناردەی عێراق لە نەوتی خاو و بەرهەمەكانی بۆ ئەمریكا لەماوەی شەش مانگدا لە كانونی دووەم تا كۆتایی حوزەیران گەیشتووەتە 64 ملیۆن و 737 هەزار بەرمیل.
بەپێی ئامارەكە ژمارەكە بە رێژەی 33.5% بەراورد بە هەمان ماوەی ساڵی 2022 بەرزبووەتەوە، كە ئەوكات هەناردە بۆ ئەو وڵاتە 48 ملیۆن و 459 هەزار بووە و ئەو ساڵەیش بە رێژەی 139% بەرزتر بووە بە بەراورد بە هەمان ماوەی ساڵی 2021.
زۆرترین هەناردەی نەوتی بۆ ئەمریكا لەم شەش مانگەدا لە مانگی شوباتدا بووە بە بڕی 12 ملیۆن و 168 هەزار بەرمیل، كەمترینیش لە مانگی حوزەیراندا بوو بە بڕی 9 ملیۆن و 330 هەزار بەرمیل.
