لە ئاڵۆزییەکانی شاری کەرکوکدا جگە لە چوار شەهید دەیان کوردیش برینداربوون، ئەمە سەرەڕای ژمارەیەکی زۆر لەو گەنجە کوردانەی لەلایەن هێزە ئەمنییەکانی عێراقەوە دەستگیرکراون.
دوایین زانیارییەکان بەوجۆرەن کە تەنها لە شەوی رابردوودا 30 گەنجی کورد لەلایەن سوپای عێراق و دژە تیرۆرەوە دەستگیرکراون، لەگەڵئەوەی بەشێکیان بە دەستەبەر ئازادکراون بەڵام ژمارەیەکی زۆر کورد هێشتا دەستبەسەرن.
پەیامنێری تۆڕی میدیایی ئێستا لە کەرکوک گواستییەوە، لە گەڕەکەکانی رەحیماوا و سەرچناری شارەکە، ژمارەیەکی زۆر ئۆتۆمبێلی سەربازی بڵاوەیان پێکراوە و گەڕان و پشکنینی ماڵەکانیش لەلایەن هێزە ئەمنییەکانەوە هەیە.
فراکسیۆنی یەکێتیی نیشتمانیی کوردستان لە ئەنجومەنی نوێنەرانی عێراق، لە ژووری ئۆپەراسێونەکانی کەرکوک لەگەڵ سوپا سالاری عێراق کۆبوونەوە و داوایان کردووە کە ئەو گەنجە کوردانەی شەوی رابردوو دەستگیرکراون ئازادبکرێن.
هەر لە کۆبوونەوەکەیاندا فراکسیۆنی یەکێتی داوایانکردووە ئەو هێزە زۆرەی لە گەڕەکە کوردنشینەکاندا بڵاوەیان پێکراوە لاببرێن.
