لەسەر سكاڵای كچێك و بە تۆمەتی فریودانی، تۆمەتبارێك لەلایەن بنكەی پۆلیسی راپەڕینەوە دەستگیركرا.
بەڕێوەبەرایەتیی پۆلیسی پارێزگای سلێمانی رایگەیاند، دوای ئەوەی كچێك سكاڵای تۆماركرد كە لەلایەن كەسێكەوە فریودراوە و بڕێك پارە و ئاڵتونی لێسەندراوە، هێزەكانی پۆلیس لێكۆڵینەوە و بەدواداچوونەكانیان دەستپێكرد و دەركەوت تۆمەتبار بە ناوی خوازراوەوە و بە بەكارهێنانی هەژماری ساختە لە تۆڕی کۆمەڵایەتی و بەبیانوی هاوسەرگیری هەشت هەزار دۆلار و بڕێك زێڕی لە سكاڵاكار سەندووە.
لێكۆڵینەوە و بەدواداچوونەكانی پۆلیس بۆ دۆزینەوە و دەستگیركردنی تۆمەتبار بەردەوام بوو، سەرەنجام توانرا شوێنی بدۆزرێتەوە و دەستگیربكرێت و دەستیش بگیرێت بەسەر بڕێك پارەدا كە بە تۆمەتبار بووە، پۆلیسی سلێمانی وادەڵێت.
ئاشكراشیكرد، لەئێستادا تۆمەتبار (ه.أ.ح. لەدایكبووی 1985) بە بڕیاری دادوەر و بەپێی ماددەی 456 لە یاسای سزادانی عێراقی راگیراوە و دانی بە تاوانەكەیدا ناوە.
