وەزیری نەوتی عێراق لە ئەنقەرە تاوتوێی سەرلەنوێ هەناردەكردنەوەی نەوت لەڕێی بەندەری جەیهانی توركییەوە دەكات.
ئەمڕۆ حیان عەبدولغەنی، وەزیری نەوت و جێگری سەرۆك وەزیرانی عێراق بۆ كاروباری وزە بە سەردانێكی فەرمی گەیشتە ئەنقەرەی پایتەختی توركیا و بڕیارە سەردانەكەی دوو رۆژ بخایەنێت.
باڵیۆزخانەی عێراق لەو وڵاتە بڵاویكردەوە، ئامانج لە سەردانەكە فراوانكردنی هەماهەنگییە لە بوارەكانی نەوت، غاز و وزە، سەرەڕای تاوتوێكردنی دۆسیەی سەرلەنوێ هەناردەكردنەوەی نەوت لەڕێی بەندەری جەیهانەوە.
بڕیارە عەبدولغەنی چاوی بە فاتح دونماز وەزیری وزە و سەرچاوە سروشتییەكان و ژمارەیەك لە بەرپرسانی توركیا بكەوێت بۆ دوپاتكردنەوەی سووربوونی عێراق لەسەر بونیادنانی پردی متمانە و پەیوەندی تا گەیشتنە رێككەوتن لەبارەی هەناردەی نەوتی عێراق، تەنها لەڕێی كۆمپانیای بەبازاڕكردنی نەوت (سۆمۆ)وە، وەك ئەوەی لە راگەیەندراوی باڵیۆزخانەكەدا هاتووە.
لە 25ی ئازاری رابردووەوە هەناردەی نەوتی هەرێمی كوردستان بۆ توركیا و لەوێشەوە بۆ بازاڕەكانی جیهان راگیرا، دوای دەرچوونی بڕیاری دادگا لە پاریس. لەوكاتەوە هەوڵەكان بۆ سەرلەنوێ هەناردەكردنەوە لەژێر دەسەڵاتی حكومەتی عێراق و كۆمپانیای سۆمۆوە نەگەیشتووەتە ئەنجام.
