بەڕێوەبەری كۆمپانیای خۆراك لە سلێمانی رایدەگەیەنێت، دەستدەكرێت بە دابەشكردنی حەوتەم سەبەتەی خۆراكی ئەمساڵ بەسەر هاوڵاتییاندا و دەشڵێت، “تائێستا هیچ رێنماییەك بۆ قەرەبووكردنەوەی بەشەخۆراكی هاوڵاتییان نەدراوە”.
شەوكەت محەمەد، بەڕێوەبەری كۆمپانیای خۆراك لە سلێمانی لە لێدوانێكدا بە تۆڕی میدیایی ئێستای راگەیاند، دابەشكردنی شەشەم سەبەتەی خۆراكی ئەمساڵ بەسەر هاوڵاتییان لە قۆناغی كۆتاییدایە و لە چەند رۆژی داهاتوودا دەستدەكرێت بە دابەشكردنی حەوتەم سەبەتەی خۆراكی ئەمساڵ بەسەر هاوڵاتییان و هاوشێوەی مانگەكانی پێشوو هەمان ماددە خۆراكییەكانن کە دابەشدەكرێن.
ئاشكراشیكرد، ساڵی رابردوو تەنها بەشەخۆراكی یەك مانگ دابەشنەكراوە و تائێستا هیچ بڕیار و رێنماییەكەمان لەلایەن حكومەتی عێراقەوە بۆ قەرەبووكردنەوەی هاوڵاتییان ئاراستە نەكراوە.
