ئەدهەم بارزانی پەیامێكی بڵاوكردەوە و دەڵێت، “رۆژی سێشەمە هاوژینەكەم بۆ سەردانی كوڕ و كچ و نەوەكانی لە مەسیف بەرێكەوت و لە یەكەم بازگەی مەسیف لە دیوی كۆڕێ-وە بۆ زیاتر لە یەك كاتژمێر و نیو رادەگیرێت و ھەموو پێداویستی و كەلوپەلەكانیان بە وردی دەپشكنرێن پاش ئەوەی كە لە سەری ڕەشەوە فەرمانی ئيزندانی بۆ دەچێت، ئەوكات مۆڵەتی چوونیان بۆ ماڵەوە پێدەدەن، بەڵام مۆبایلیان لێوەردەگیرێت و تاوەكو ئێستاش لە لای ئەوانە ماوە بۆ كۆپی لەسەر گرتن”.
دەشڵێت، “من داوا لە ھەموو لایەنەكان و حكومەتی عێراق دەكەم كە سنوورێك بۆ ئەم تاكڕەوییە لە خاكی پیرۆزی كوردستان كە خاكی شەھیدان و دەیان ھەزار شۆڕشگێڕ و تێكوشەری وەكو منن دابنێن و ئەمانەی كە ئەم رەفتارەیان لە گەل خێزانم كردووە چ ئەم خاتوونە بێت چ خاتوونی ھەر ھەژار و شەھیدێك بێت لە لای من وەك یەكن و كە ھاتن لە ئۆتۆمبێلیان دابەزاندووە و بابەت بە بابەت پشكنینیان بۆ ھەموو پێداویستیە تایبەتەكانیان كردووە، ئاخۆ چی لە خەڵكانێكی تر دەكەن یاخود كردوویانە”.
ئەدهەم بارزانی جەختیكردەوە و وتی، “ ئەمە لەكاتێكدایە كە من ھیچ پەیوەندیەكی سیاسی و حزبیم بەو حزبەوە نەماوە و ئەگەر كارێكی سیاسی لە سەر گۆڕەپانی كوردستان و عێراق ئەنجامبدەم مافی ڕەوای خۆمە و ئەنجامی دەدەم وەك ھەر ھاوڵاتییەك كە یاساكانی كوردستان و دەستووری عێراق بە ھەموومانیداوە.
