کۆمەڵەی کێڵگە پەلەوەرییەکان لە سلێمانی رایگەیاند، نزیکەی 40%ی مریشک لە سەرجەم ناوچەکانی هەرێمی کوردستان بەهۆی ڤایرۆسێکەوە مرداربوونەتەوە کە ماوەی سێ ساڵە بڵاوبووەتەوە.
سەرۆکی کۆمەڵەکە، نازم عەبدوڵا، لە کۆنگرەیەکی رۆژنامەوانیدا رایگەیاند، کۆمەڵەکە سێ ساڵ پێش ئێستا داوای دابینکردنی ڤاکسینی بۆ ئەو ڤایرۆسە کرد کە دەبێتە هۆی نەخۆشی لە مریشکەکاندا لە سەرجەم ناوچەکانی هەرێم، بەهۆیەوە %40ی مریشک مرداربوونەتەوە.
ئاماژەی بەوەشکرد، ئەم ڤایرۆسە “ناگوازرێتەوە بۆ مرۆڤ و ماوەی هەفتەیەک دەمێنێتەوە، هەروەها پشکنینی بەردەوام هەیە لەلایەن لیژنە هاوبەشەکان و بەشی ڤێتێرنەرییەوە بۆ بەدواداچوون بۆ ئەو مریشکانەی لە بازاڕەکاندا هەن بۆ پشکنینیان و رێگریکردن لە بڵاوبوونەوەی نەخۆشییەکە”.
وتیشی، “تەرخانکردنی وەزارەتی کشتوکاڵ بۆ ئەم بوارە لە هەموو وڵاتان لە 15% بۆ 25%، بەڵام لە هەرێمی کوردستان تەرخانکردنی وەزارەتی کشتوکاڵ لە 2% تێناپەڕێت”.
سەبارەت بە بڕی بەرهەمی مریشکی ناوخۆیی لە هەرێمی کوردستان، سەرۆکی کۆمەڵەی کێڵگە پەلەوەرییەکان رایگەیاند، “بەرهەمهێنانی ئێمە دە هێندەی پێویستیی ناوخۆییە، هەروەها پڕۆژەکانی پەلەوەر نزیکەی 500 هەزار هەلی کار بۆ هاوڵاتییان لە سەرتاسەری هەرێم دەڕەخسێنن و رۆژانەش، خاوەن کێڵگە پەلەوەرییەکان تووشی زیانێکی دارایی گەورە دەبن بەهۆی ئەم ڤایرۆسەوە”.
