ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، لە وەزارەتی دارایی عێراقەوە رێنمایی تایبەت بە یاسای بودجە دەربكرێت دەبێت تا كۆتایی ئەم مانگە مووچە و بودجەی هەرێمی كوردستان بە تەواویی لە لایەن بەغدادەوە رەوانە بكرێت.
د. نەرمین مەعروف ئەندامی لیژنەی دارایی لە ئەنجومەنی نوێنەرانی عێراق لە لێدوانێكدا بە تۆڕی میدیایی ئێستای راگەیاند، ناردنی بودجە و مووچەی هەرێمی كوردستان پەیوەندی بە هەناردەی نەوتەوە نییە، بەو پێیەی هەرێم ئامادەیی خۆی دەربڕیوە كە نەوت رادەستی بەغداد بكات و گرفتەكە بەهۆی راگرتنی هەناردەی نەوتەوەیە لەنێوان عێراق و توركیا و لە 25ی ئازاری ئەمساڵەوە كە هەناردەی نەوت راگیراوە حكومەتی عێراق پابەندییە داراییەكانی هەرێمی كوردستانی دەكەوێتە ئەستۆ.
ئاماژەی بۆ ئەوەش كرد، ئەگەر هەناردەی نەوت دەستپێنەكاتەوە دەبێت هەرێم نەوتەكە رادەستی بەغداد بكات و بۆ پێویستی ناوخۆی پێبڕبکرێتەوە و دوای دەركردنی رێنمایی پێویست بۆ یاسای بودجە لەلایەن وەزارەتی داراییەوە دەبێت لەم مانگەوە حکومەتی عێراق مووچە و بودجەی هەرێم بە تەواویی بنێرێت.
