دادگای باڵای فیدراڵی بە نوسراوێك ئەنجومەنی نوێنەرانی عێراق ئاگاداردەكاتەوە لەبارەی ئەو تانەیەی لەلایەن حكومەتەوە لەسەر یاسای بودجە پێشكەش كراوە.
بەپێی میدیا عێراقییەكان نووسراوی پێڕاگەیاندنی داوای ژمارە (153/ فیدراڵی/ 2023) لەلایەن محەمەد شیاع سودانی، سەرۆك وەزیران دژ بە محەمەد حەلبوسی، سەرۆكی ئەنجومەنی نوێنەران تۆماركراوە.
تانەكە پەیوەستە بە ژمارەیەك لە ماددەكانی یاسای بودجە بەهۆی ئەو گۆڕانكارییانەی لەلایەن ئەنجومەنی نوێنەرانەوە بەسەریدا هێنراوە و تیایدا سودانی داوایكردووە كاركردن بەو ماددانە رابگیرێت تا دەرچوونی بڕیاری كۆتایی دادگا.
هەریەك لە ماددەكانی (11، 12 و 13)ی بودجە پەیوەست بە پشكی هەرێمی كوردستان، هیچ كام لەو ماددانە تانەیان لەسەر نەدراوە.
یاسای بودجەی گشتیی عێراق بۆ ساڵانی (2023، 2024 و 2025) لە 12ی حوزەیرانی رابردوو لەلایەن ئەنجومەنی نوێنەرانەوە پەسەندكرا، لە 21ی حوزەیران لەلایەن لەتیف رەشید، سەرۆك كۆماری عێراق پەسەندكرا و لە 26ی هەمان مانگ لە رۆژنامەی وەقائیعدا بڵاوكرایەوە و بەوەش چووە بواری جێبەجێكردنەوە.
بۆ بینینی نووسراوی تانەكە كلیك لێرە بكە.
