دانوستاندنەکان لە نێوان یانەی پاریس سان جێرمان و جولیان ناگیلسمانی ڕاهێنەری ئەڵمانی شکستیهێنا.
بەگوێرەی زانیارییەکانی ڕۆژنامەی “لیکیپ”ی فەرەنسی، ئیدارەی پاریس سان جێرمان زیاتر لە مانگێکە سەرقاڵە بە دانوستاندن لەگەڵ لێپرسراوی کارەکانی جولیان ناگیلسمان، بەڵام لە کۆتاییدا ڕاهێنەرە ئەڵمانییەکە تەواوی مەرج و خواستەکانی یانەکەی فەرەنسای ڕەتکردووەتەوە و ئامادە نەبووە پەیوەندییان پێوەبکات.
لە ئێستادا ئیدارەی پاریس هەوڵەکانی بە ئاراستەی لویس ئێنریکی و تیاگۆ مۆتا دەستپێکردووە، کە یەکەمیان بێکارە و چاوەڕوانی ئۆفەرێکی گونجاوە، دووەمیشیان ڕاهێنەری یانەی بۆلۆنیای ئیتاڵییە.
ڕۆژنامەی لیکیپ نووسیویەتی، ئیدارەی یانەی پاریس سان جێرمان درێژە بە کارەکانی کریستۆف گالتیێری فەرەنسی نادات، بۆ پرۆژەی نوێی یانەکە پێویستیان بە ڕاهێنەرێکی گەورەترە کە بتوانێت ناسناوە ئەوروپییەکان بچنێتەوە.
