وەزارەتی كارەبای هەرێم رایدەگەیەنێت، پڕۆسەی چاكسازیی كۆمپانیای داناگاز لە كێڵگەی كۆرمۆڕ كۆتاییهات و ئاستی بەرهەمهێنانی كارەبا ئاسایی بووەوە.
بەپێی راگەیەندراوێكی وەزارەتی كارەبای هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، بەهۆی پڕۆسەی چاكسازی لە كێڵگەی كۆرمۆر لە رۆژی 22ی مانگی رابردوو ئاستی بەرهەمهێنانی گاز كەمببووەوە و كاریگەریی لەسەر كەمبوونەوەی بەرهەمهێنانی كارەبا و ماوەكانی پێدانی كارەبا كردبوو.
لە راگەیەندراوەكەدا هاتووە، بڕیاربوو لە سێی ئەم مانگە پڕۆسەكە تەواوبێت، بەڵام بەهۆی هەندێك گرفتی تەكنیكی، پڕۆسەكە درێژكرایەوە، ئەمڕۆ پڕۆسەی چاكسازیی لە كێڵگەی كۆرمۆر كۆتاییهات و ئاستی بەرهەمهێنانی كارەبا ئاسایی بووەوە.
وەزارەتی كارەبا سوپاسی پشوودرێژیی هاوڵاتییان بۆ تێگەیشتن لە پڕۆسەكانی چاكسازیی وێستگەكان و كێڵگەكان دەكات، كە ئەم پڕۆسە چاكسازییە هاوكات بووە لەگەڵ بەرزبوونەوەی پلەكانی گەرما و زیادبوونی خواست لەسەر كارەبا.
هەروەها سوپاسی تیمەكانی هەردوو وەزارەتی كارەبا و سامانە سروشتییەكان دەكات توانییان وێڕای كەمبوونەوەی ئاستی بەرهەمهێنانی كارەبا و خۆگونجاندن لەگەڵ پڕۆسەی چاكسازیی كۆمپانیای داناگاز لە كێلگەی كۆرمۆر، نەیانهێشت كاریگەری لەسەر سیستمی كارەبا هەبێت.
