دەزگای ئاسایشی هەرێم دەستگیركردنی 18 كەسی بیانی رادەگەیەنێت و هەوڵی كۆچی نایاسایی پوچەڵدەكاتەوە.
بەڕێوەبەرایەتیی ئۆپەراسیۆنەكانی دەزگای ئاسایش لەسەر سنووری هەرێمی كوردستان، هەوڵێكی كۆچی نایاسایی پوچەڵدەكاتەوە.
بەپێی راگەیەندراوێكی دەزگای ئاسایشی هەرێم كە وێنەیەكی دەست تۆڕی میدیایی ئێستا كەوتووە و تێیدا هاتووە، دوای بەدەستهێنانی زانیاریی ورد لەسەر هەوڵێكی كۆچی نایاسایی و بەزاندنی سنووری هەرێمی كوردستان، بە فەرمانی دادوەری دادگای لێكۆڵینەوە، 2ی ئەم مانگە لەسەر سنوورەكانی هەرێمی كوردستان ، لەلایەن بەڕێوەبەرایەتیی ئۆپەراسیۆنەكانی دەزگای ئاسایشەوە، توانرا 18 كەسی بیانی دەستگیربكەن، لەگەڵ رێبەرەكانیان و ئەو دوو ئۆتۆمبێلەی دەیانگواستنەوە، كە بەنیازبوون بە شێوەیەكی نایاسایی بێنەناو خاكی هەرێمی كوردستانەوە.
لە راگەیەندراوەكەدا هاتووە، لە ئەنجامی لێكۆڵینەوەكان دەركەوت، گەورە تیرۆریستێك بەناوی ( م ، گ ، ع ) لە نێویاندا هەیە.
تۆمەتباران بەپێ ی ماددەی 39ی ی یاسای ژمارە 76 ی ساڵی 2017 ی تایبەت بە بیانیەكان و تیرۆریستەكەش بە ماددەی دووی یاسای تیرۆر راگیراون و لێكۆڵینەوە لە دۆسییەكانیان بەردەوامە.
