کوێستان محەمەد وەزیری کار و کاروباری کۆمەڵایەتیی هەرێمی کوردستان، ئامارێکی منداڵانی ئیشکەری لە پارێزگاکانی سلێمانی و هەڵەبجە بڵاوکردەوە بەپێی ئامارەکە لە هەردوو پارێزگاکە 1466 منداڵی ئیشکەر هەن.
لە لێدوانێکی رۆژنامەوانیدا وەزیری کار و کاروباری کۆمەڵایەتیی هەرێمی کوردستان، بەبۆنەی رۆژی جیهانیی منداڵانەوە کە ساڵانە لە 1ی حوزەیراندا دەکرێتەوە، رایگەیاند، “یەکێک لە ئەرکە گرنگەکانی وەزارەتەکەمان گرنگیدان و پاراستنی منداڵانی هەرێمی کوردستانە، لەناویشیاندا منداڵانی ئیشکەر”.
باسی لەوەکرد کە منداڵانی ئیشکەر نابێت تەمەنیان لە خوار تەمەنی یاساییەوە بێت کە تەمەنی 15 ساڵە و ئەوانەشی لەسەروو ئەو تەمەنەوەن و کاردەکەن دەبێت وەزارەتەکەی ئێمە بیانپارێزن.
ئاماژەی بە ئامارێک کرد کە لە ئەنجامی رووپێوییەک لە پارێزگای سلێمانی و هەڵەبجە دەستیانکەوتووە، بەپێی ئامارەکە، لە شاری سلێمانی 1010 منداڵی ئیشکەر هەن، لە هەڵەبجەش 124 منداڵ ئیش دەکەن.
هەروەها لە ئیدارەی راپەڕین، 121 منداڵی ئیشکەر و لە ئیدارەی گەرمیانیش 211 منداڵی ئیشکەر هەن، کۆی گشتیی منداڵانی ئیشکەر لە پارێزگای سلێمانی و هەڵەبجە 1466 منداڵن.
باسی لەوەکرد، “ئامارەکە جێگای هەڵوێستەکردن و کاربۆکردنە، بۆیە لە وەزارەتی کار و کاروباری کۆمەڵایەتی هەوڵدەدەین کاربکەین بۆ کەمکردنەوەی ئەو ژمارەیە و چاودێریکردنی ئەو منداڵانە تاوەکو لە شوێنی کارەکانیان نەچەوسێنرێنەوە و مافەکانیان پێشێل نەکرێت”.
جەختیشیکردەوە کە لە هەردوو پارێزگای دهۆک و هەولێر هەمان رووپێوی ئەنجامدەدەن.
