ئەندامێكی ئەنجومەنی نوێنەران ناكۆكییەكان لەبارەی پشكی هەرێمەوە بە هۆكاری دواكەوتنی پەسەندكردنی بودجە ناودەبات.
رائد مالكی، ئەندامی لیژنەی یاسایی ئەنجومەنی نوێنەرانی عێراق رایگەیاند، دابەشكردنی داهاتی نەوت لەنێوان ناوەند و هەرێم دیارترین ناكۆكییەكانە سەبارەت بە پەسەندكردنی پرۆژەیاسای بودجە.
مالكی لە لێدوانیكدا بۆ میدیا عێراقییەكان وتیشی، “پرۆژەیاسای بودجە ساز و ئامادەیە بۆ دەنگدان لەسەری”. دووپاتیشیكردەوە، پەسەندكردن و دیاریكردنی وادەی دانیشتنی ئەنجومەن لە چاوەڕوانیی سازانی لایەنە سیاسییەكاندایە.
دواكەوتنی بودجە كاریگەریی نەرێنی لەسەر چالاكییە ئابورییەكان، پەككەوتنی پرۆژەكان، سەرموچە و بەرزكردنەوەی مووچەی فەرمانبەران، گرفتی دۆلار و لێكەوتە نەرێنییەكانی دیكە دەبێت، وەك ئەوەی ئەو پەرلەمانتارە ئاماژەی پێدا.
