ئەستێرەیەکی دێرینی ئەڵمانیا و بایرن میونشن بانگەشەی ئەوە دەکات، کە تۆماس توخێل بەرگەی هەڵسوکەوتی بەڕێوەبەرانی بایرن میونشن ناگرێت و دەستلەکاردەکێشێتەوە.
دیتمار هامان، ئەستێرەی دێرینی بایرن و شرۆڤەکاری ناوداری کەناڵە ئەڵمانییەکان لە شرۆڤەکانیدا ئاماژە بە سروشتی کارگێڕیی بایرن و تۆماس توخێل دەکات و دەڵێت، “پێموانییە بابەتی دوورخستنەوەی توخێل لەم نزیکانەدا ڕووبدات، یان لەوەیە ڕوو نەدات، بەڵام دڵنیام خۆی وازدەهێنێت، ناتوانێت بەردەوام بێت و دەستلەکارکێشانەوەش پێشکەش دەکات.”
هامان لە درێژەی لێدوانەکانیدا بە “دەیلی مەیڵ”ی ڕاگەیاندووە، “کاتێک لەگەڵ کەسانێکی وەهادا کاردەکەیت، دەبێت پرسیار لەخۆت بکەیت: ئایا من دەمەوێت لەم جۆرە یانانە و بەو مێنتاڵە کارگێڕییەوە کاربکەم؟ لە ڕۆشنایی بڕیار و ڕاسپاردەکانی ئیدارەی بایرنەوە پێتاندەڵێم، توخێل وەرزی داهاتوو ڕاهێنەری بایرن میونشن نابێت.”
لێدوانەکانی هامان هاوکاتن لەگەڵ دوورخستنەوەی ئۆلیڤەر کانی بەڕێوەبەری جێبەجێکار و حەسەن ساڵحەمیدزیچی بەڕێوەبەری وەرزشی لە پۆستەکانیان، ڕاستەوخۆ دوای ئەوەی یانە ئەڵمانییەکە ناسناوی خولی ئەڵمانیای بەدەستهێنا.
