شۆفێری ئیسپانیی تیمی فێراری، کارلۆس ساینز داوا لە یەکێتیی نێودەوڵەتیی ئوتۆمبێلە خێراکان (فیا) دەکات، لەبارەی ڕێسای پێشبڕکێکردنی شۆفێرانەوە ڕوونکردنەوە بدات.
کارلۆس ساینز بە میدیاکانی ڕاگەیاندووە، “لە گۆڕەپانی پێشبڕکێکان و بەتایبەت لە وەرزی زستان گەیشتووین بەو بارودۆخەی، کە نازانین ڕێساکانی ململانێکردنی شۆفێران و کێبڕکێکردنیان بە چ جۆرێکە، چی ڕێگەپێدراوە و چ شتێکیش ڕێگەپێدراو نییە، ئێمە ئێستا نازانین بە چ شێوەیەک ڕێگەپێدراوە پارێزگاری لە پێگەکانمان بکەین”.
هەروەها دەڵێت، “نازانین پلانەکانی بەرگریکردن لە پێگەکانمان بەچی گەیشتوون، هەمیشە لە وەرزی زستان کێبڕکێی قورس دروستدەبێت، ڕووبەڕووبوونەوەکان قووڵتر و بەهێزترن، پێویستە فیا بۆ وەرزی داهاتوو ڕوونکردنەوەی باشترمان دەربارەی ڕێساکانی کێبڕکێکردن پێبدات”.
لەم وەرزەدا تیمی فێراری لە ڕیزبەندیی تیمەکاندا پلەی سێیەمی گرتووە و بە جیاوازییەکی زۆرەوە کەتوونەتە دوای تیمەکانی مێرسیدس و ڕێدبوڵ، تەنانەت شۆفێرانی تیمەکەش (ساینز و لوکلێر) بۆ پلەکانی شەشەم و حەوتەم دابەزیون.
