بەڕێوەبەرایەتیی دارستان و پاوانی سلێمانی رایدەگەیەنێت، ئاگركردنەوە لە دارستانەكانی گۆیژە و ئەزمڕ و هەڕووتە و دەباشان قەدەغەكران.
بەپێی راگەیەندراوێكی بەڕێوەبەرایەتیی دارستان و پاوانی سلێمانی كە وێنەیەكی دەست تۆڕی میدیایی ئێستا كەوتووە و تێیدا هاتووە، “بەمەبەستی پاراستنی دارستانەكانی گۆیژە و ئەزمڕ و هەڕووتە و دەباشان لەهەر مەترسییەكی سووتان و ئاگركەوتنەوە، لیژنەی فریاگوزاریی خێرای سلێمانی بڕیاریدا كە ئاگركردنەوە بە هەموو شێوەیەك لەدارستانەكان و دەوروبەری قەدەغە بكرێت”.
لە راگەیەندراوەكەدا هاتووە، “ئەمساڵ بەهۆی بارانی زۆرەوە گژوگیایەكی زۆر لەدارستانەكاندا گەشەیان كردووە و ئێستاش بەهۆی وشك بوونییەوە مەترسی ئاگركەوتنەوەی تێدا زۆرە”.
بەڕێوەبەرایەتییەكە داواش لە هاوڵاتییانی پارێزگای سلێمانی و گەشتیاران دەكات كە “لە كاتی سەردانی سنووری دارستانەكانی گۆیژە و ئەزمڕ و دەباشان و هەڕووتە بەهیچ شێوەیەك ئاگرنەكەنەوە، و هاوكاری و رێنمایی گەشتیارە عەرەب و بیانیەكان بكەن تا پابەندی ئەو بڕیارەبن، و هەمووان هاوكار بین لەپاراستنی ژینگەی شارەكەماندا”.
