كارەكانی هەڵمەتی نیشتمانی روواندنی یەك ملیۆن نەمام لەسەر بڕیار و راسپاردەی بافڵ جەلال تاڵەبانی سەرۆكی یەكێتیی نیشتمانیی كوردستان تا دێت چڕتردەبێتەوە و ئەمڕۆ سێشەممە هەڵمەتەكە گەیشتە ناوچە دابڕێندراوەكانی كوردستان.
لەوبارەیەوە حسێن حەمە كەریم نوێنەری نووسینگەی سەرۆك بافڵ جەلال تاڵەبانی رایگەیاند، “ئەمڕۆ قۆناغێكی تری هەڵمەتەكەمان لە سنووری قەزای خانەقین و بەسەوزكردنی پاركێك راگەیاند بەچاندنی چەندین جۆری نەمام كە لەگەڵ سروشت و كەشوهەوای ئەم قەزایەدا بگونجێت.
وتیشی، “هەڵمەتەكە رۆژانی داهاتووش بەردەوام دەبێت لەناو شار و هەردوو ناحیەی گوڵاڵە و جەلەولا و سەعدییە دەگرێتەوە”.
هەڵمەتی نەمام روواندن بە ئامادەبوونی بەڕێوەبەری فەرمانگەكانی شارەوانی و ژینگە و ناوەندی خانەقینی كۆمەڵەی كوردستانێكی سەوز و ژمارەیەكی بەرچاو لەژینگەدۆستان بەڕێوەچوو كە هەڵمەتەكەیان بە هەنگاوێكی گرنگ وەسفكرد بۆ خزمەتكردنی سنوورەكەیان و خۆگونجاندن لەگەڵ گۆڕانكارییەكانی كەشوهەوا و گرفتی بەبیابانبوون لەسنوورەكەیاندا”.
