ئەگەر هەیە لەسەر بەرپرسیاریەتی فیدراسیۆنی تۆپی پێی ئەرجەنتین تەرمی مارادۆنا لە گۆڕ دەربهێنرێت و بڕیاری مۆمیاکردنی بدرێت.
مارادۆنای ئەفسانەی تۆپی پێی ئەرجەنتین و جیهان، لە کۆتا وەسیەتیدا داوایکردووە جەستەی مۆمیا بکرێت، بە ماتیاس مۆرلای پارێزەری ڕاگەیاندووە، ” دەمەوێت هاوشێوەی ڤلادیمێر لینینی سەرکردەی ڕووسیا مۆمیا بکرێم”
جەستەی ڤلادیمێر لینین لە ساڵی 1924وە مۆمیاکراوە و لە مەیدانی سوور لە مۆسکۆ نمایشکراوە و تاوەکو ئێستاش خەڵکی وڵاتەکە و دەرەوەی ڕووسیاش سەردانی دەکەن.
نامەکەی مارادۆنا لە 13ی ئۆکتۆبەر بۆ پارێزەرەکەی نوسراوە، بەر لە چەند هەفتەیەک گیان سپاردنی بە جەڵتەی دڵ، تیایدا دەڵێت، ” دوای لێکدانەوەیەکی قوڵ، گەیشتمە ئەو بۆچوونەی کە حەزدەکەم لەدوای مردنم جەستەم مۆمیا بکرێت، لە مۆزەخانەی بۆینس ئایرس نمایشبکرێت، لەگەڵ زۆرترین دەستکەوتەکانم، خەڵاتە تاکە کەسییەکان و کەلوپەلە تایبەتییە خۆشەویستەکانم، لێرەدا دەمەوێت خەڵکی سەردانم بکەن و خۆشەویستم بۆ دەربڕن”.
بیرۆکەی مۆمیاکردنی جەستەی مارادۆنا لەلایەن ماریۆ پۆدری پارێزەری ڤیرۆنیکا ئۆجیدای هاوسەرییەوە بە فەرمی کراوە، دەیانەوێت لە گۆڕستانی بیلا ڤێستا لە گۆڕەکەی دەریبهێننەوە.
لەم بارەیەوە دەڵیت، ” مارادۆنا لەگەڵ براکانیشی باسی لەم بابەتە کردووە، دەمانەوێت مەزارگەیەکی تایبەتی بۆ بونیادبنێین تاوەکو هەوادارانی بتوانن سەردانی بکەن”.
پارێزەرەکە دووپاتیدەکاتەوە، پێشنیاز و داواکارییەکەیان ئاڕاستەی فیدراسیۆنی تۆپی پێی ئەرجەنتین کردووە، دەشیانەوێت تێچووی ئەم کارە لە ئەستۆی فیدراسیۆنەکە بێت وەک ڕێزلێنانێک لە ئەفسانەکە.
