بانکی نێودەوڵەتی رایگەیاند، دەستەی بەڕێوەبەرایەتی، کاندیدی ئەمریکی – هیندی بەناوی ئاجای بەنگا هەڵبژاردووە بۆ سەرۆکایەتیکردنی بانکەکە.
ئاجای بەنگا تەمەنی 63 ساڵە بە رەچەڵەک هیندییە و خاوەنی رەگەزنامەی ئەمریکییە، تاکە کاندید بوو بۆ پۆستی سەرۆکی بانکی نێودەوڵەتی کە دامەزراوەیەکی نێودەوڵەتییە بۆ رووبەڕووبوونەوەی هەژاری و لە ئەندامێتی 189 وڵات پێکهاتووە.
بەنگا کوڕی ئەفسەرێکی سوپای هیندستانە و ئەزموونی دەیان ساڵەی لە کۆمپانیا گەورەکاندا هەیە، پێشتر پۆستی بەڕێوەبەری جێبەجێکاری کۆمپانیای ماستەرکاردی بەدەستهێناوە .
سەرۆکی نوێی بانکی نێودەوڵەتی لە دووەمی مانگی حوزەیرانی داهاتوو بۆ ماوەی 5 ساڵ دەستبەکار دەبێت، ئەمەش رۆژێک دوای کۆتایی هاتنی خولی سەرۆکی پێشوو دەیڤید مالپاس کە لەلایەن دۆناڵد ترەمپ سەرۆکی پێشووی ئەمریکاوە هەڵبژێردرا .
مالپاس زوو کۆتایی بە کارەکەی هێنا لە بانکی نێودەوڵەتی دوای ئەوەی کەوتە ژێر فشارەوە بەهۆی ئەوەی رەتیکردەوە، ئاشکرایبکات ئایا لەگەڵ کۆدەنگیی زانستی سەبارەت بە گۆڕانی کەشوهەوا هاوڕایە یان نا.
