جێگری سەرۆككۆماری ئەفغانستان خۆی بەسەرۆككۆماری كاتیی وڵاتەكەی ناساند.
ئەمیروڵڵا ساڵح، جێگری سەرۆكی ئەفغانستان ئەمڕۆ سێشەممە لە تویتێكدا كە لە هەژماری خۆی بڵاویكردووەتەوە دەڵێت، “من لە ئەفغانستانم و سەرۆكی شەرعیی كاتیی وڵاتم”.
باسی لەوەشكردووە، “بەپێی دەستووری ئەفغانستان لە حاڵەتەكانی ئامادەنەبوون، دەستلەكاركێشانەوە و مردنی سەرۆك، جێگری سەرۆك دەبێتە سەرۆكی كاتی”.
ئەمیروڵڵا ساڵح جەختی لەوەشكردووەتەوە، “لەئێستادا من لە ناوخۆی وڵاتم و سەرۆكی شەرعیی كاتیی ئەفغانستانم و لەگەڵ فەرماندە سەربازییەكانیش لە پەیوەندی بەردەوامدام”.
ئەوەش دوای ئەوەدێت، پێشتر لە میدیاكانەوە باس لەوەكرابوو كە ئەشرەف غەنی سەرۆككۆماری ئەفغانستان پێش جێهێشتنی وڵات دەستیلەكاركێشاوەتەوە.
دوو ڕۆژ لەمەوبەر، هێزەكانی تاڵیبان چوونە ناو كابول و دەسەڵاتیان گرتەدەست و لەهەوڵی پێكهێنانی حكومەتێكی كاتیدان.
