ئەمریکا و یەکێتیی ئەوروپا پشتگیریان لە پلانێکی گەورە کردووە بۆ دروستکردنی رێڕەوێکی ئابوری کە ئەوروپا بە رۆژهەڵاتی ناوەڕاست و هیندستانەوە ببەستێتەوە لە رێگەی شەمەندەفەر و دەریاوە کە جۆ بادین سەرۆکی ئەمریکا بە پڕۆژەیەکی گەورە پێناسەی کردووە.
نارێندرا مودی، سەرۆک وەزیرانی هیندستان و ئورسولا ڤۆن دێر لێین، سەرۆکی کۆمیسیۆنی ئەوروپا لە میانی کۆبوونەوەی لوتکەی سەرکردەکانی جی 20 کە لە نیودەلهی بەڕێوەچوو پڕۆژەکەیان راگەیاند.
هاوکات رێڕەوەکە هەریەکە لە هیندستان، سعودیە، ئیمارات، ئوردن، ئیسرائیل و یەکێتیی ئەوروپا لە رێگەی بەندەرە دەریاییەکان و رێڕەوی شەمەندەفەرەوە بەیەکەوە دەبەستێتەوە، وەک هەوڵێک بۆ خێراتر و هەرزانکردنی بازرگانی و بەرزکردنەوەی هاوکاری ئابوری و پەیوەندیی دیجیتاڵی لە سەرانسەری ناوچەکەدا.
لەلایەکی دیكەوە پڕۆژەکە دەتوانێت ئاڵوگۆڕی بازرگانی نێوان هیندستان و ئەوروپا بەڕێژەی 40% خێراتر بکات و یارمەتی ئاساییکردنەوەی پەیوەندییەکانی نێوان ئیسرائیل و وڵاتانی کەنداو بدات، جەیک سولیڤان، راوێژکاری ئاسایشی نیشتمانیی ئەمریکا لەوبارەیەوە دەڵێت، “ئێمە پێمانوایە خودی پڕۆژەکە بوێرانەیە و گۆڕانکارییەکی گەورەیە لە ناوچەکەدا”.
