سێ راوچی دەستگیركران كە جگە لە كەوی كوژراو و زیندوو، چەندین كەرەستەی جۆراوجۆریان پێبووە.
بەڕێوەبەرایەتیی پۆلیسی دارستان و ژینگەی پارێزگای سلێمانی دەڵێت، “مەفرەزەیەک لە کارمەندانی بنکەی پۆلیسی دارستانی خدران، دەرچوونێکیان ئەنجامدا بۆ سنووری ناحیەی خدران بە مەبەستی پاراستنی سروشتی ژینگە و ئاژەڵ و باڵندە کێوییەکان، لە ئەنجامدا دوای گەڕان و پشکنینی ورد توانییان سێ هاوڵاتی دەستگیربکەن کە سەرقاڵی راوکردنی باڵندەی (کەو) بوون”.
بەپێی راگەیەندراوی بەڕێوەبەرایەتیی پۆلیسی دارستان و ژینگەی پارێزگای سلێمانی، دەستگیراوە بەسەر کەل و پەلەکانی راوچییەكاندا کە بریتیبوون لە قەفەز، دەسكەداو، رادیۆی میمۆری، موكەبەرە، پاوەربانك، مقەست، لەگەڵ دوو کەوی زیندوو و یەك کەوی کوژراودا.
ئاماژەی بۆ ئەوەش كردووە كە پەڕاوی لێکۆڵینەوە بۆ دۆسیەی دەستگیركراوەكان رێکخراوە و رادەستی دادوەر کراوە بۆ گرتنەبەری رێکاری یاسایی.
