بافڵ جەلال تاڵەبانی سەرۆکی یەکێتیی نیشتمانیی کوردستان، بە بۆنەی رۆژی جیهانیی كرێكارانەوە پەیامێكی ئاراستەی كرێكارانی كوردستان كرد و دەڵێت، یەكێتی هەمیشە لە خەمی بەدیهێنانی ماف و داوا رەواكانی كرێكاراندا بووە.
لە پەیامەكەیدا سەرۆكی یەکێتیی نیشتمانیی کوردستان ئاماژە بۆ ئەوە دەكات كە “یەكێتیی نیشتمانیی كوردستان لە هەناوی ئەم چینە شۆڕشگێڕە ماندوونەناسەوە گەشەیكرد” و روو لە كرێكاران رایگەیاند، “كوردستان قەرزاری دەستە ماندووەكانی ئێوەیە”.
دەقی پەیامەكە:-
رۆژی جیهانیی كرێكاران لە هەموو كرێكاران و بونیادنەرانی كوردستان پیرۆزبێت و دەستی ماندووبوونیان دەگووشم.
كرێكاران و رەنجدەران پایەیەكی سەرەكیی كۆمەڵگە و بزوێنەری شۆڕشەكانی گەلەكەمانن، یەكێتیی نیشتمانیی كوردستانیش لە هەناوی ئەم چینە شۆڕشگێڕە ماندوونەناسەوە گەشەیكرد، هەر بۆیە خۆی بە بەشێكی دانەبڕاوی ئەم هێزە كاریگەرە دەزانێت و مێژوو و قوربانییەكانیان لە یادناكات.
یەكێتیی نیشتمانیی كوردستان هەمیشە لە خەمی بەدیهێنانی ماف و داوا رەواكانی كرێكاران بووە و هەوڵیداوە لەپێناو دەستەبەركردنی ژیانێكی شایستە و رەخساندنی دەرفەتی كار، ئەمەش بە ئەركی خۆمان دەزانین و وەفادارییەكی بچووكە بەرامبەر بە گەورەیی و كاریگەریی ئەو هێزە خۆڕاگرە.
دووبارە ئەم رۆژەتان پیرۆزبێت و كوردستان قەرزاری دەستە ماندووەكانی ئێوەیە.
دڵسۆزتان
بافڵ جەلال تاڵەبانی
سەرۆکی یەکێتیی نیشتمانیی کوردستان
