ئاڵۆزییەکانی سودان پێدەنێتە هەشتەم رۆژییەوە، لەگەڵ ئەوەشدا پێکدادان و شەڕ ناو بە ناو لەنێوان دوو لایەنی ناکۆکدا بەردەوامە، لەگەڵ ئەوەی بەبۆنەی جەژنی رەمەزانەوە ئاگربەست لەنێوان سوپا و هێزەکانی پشتیوانیی خێرادا راگەیەندرا.
سەرچاوە ناوخۆییەکان باس لەوە دەکەن کە فڕۆکە جەنگییەکان و هێلیکۆپتەرەکان ئۆپەراسیۆنی چڕ لە شاری عومدورمان ئەنجامدەدەن، هەروەها تەرمی بەجێماو لە کۆڵانەکاندا هەن و لە ناوچەی پیشەسازیی خرتومیش تاڵانکاری دەستیپێکردووە.
ئاماژە بەوەکراوە کە دەنگی تەقەیەکی زۆر دەبیسترێت، سوپای سودان داوا لە هێزی پشتیوانیی خێرا دەکات رێز لە ئاگربەستی رۆژانی جەژن بگرێت.
لەلایەکی دیکەوە، ئەمریکا داوای لە فەرماندەی هێزەکانی سوپای سودان عەبدولفەتاح بورهان کردووە، هاوڵاتییانی ئەمریکی پارێزراو بن و دووربن لە زیانەکانی ئەو ناکۆکییانە.
