نوێنەری پەنابەرانی باکووری کوردستان لەبارەی کوژرانی هاوڵاتییەکی باکووری کوردستان لە ناو فامیلی مۆڵی دهۆک رایگەیاند، “ئەمڕۆ دوو رۆژە ئەو تاوانە کراوە تاوانبارەکە دەستگیرنەکراوە و میتی تورکیا ساڵی رابردوو لە هەمان شوێن لەلایەن میتی تورکیاوە تەقە لەو هاوڕێیەی ئێمە کراوە و بریندارکراوە”.
لە کۆنگرەیەکی رۆژنامەوانیدا، موسا خالید نوێنەری پەنابەرانی باکووری کوردستان لە هەرێم رایگەیاند، “ئەو هاوڕێیەمان کە دوو رۆژ بەر لە ئێستا لە فامیلی مۆڵی دهۆک شەهیدکرا، سیاسی بووە و لەبەر کاری سیاسی لەلایەن میتەوە تەقەی لێکراوە و شەهیدکراوە”.
ئاماژەی بەوەکرد، “لە دوو ساڵدا زیاتر لە چوار هاوڵاتیی ئێمە لە هەرێمی کوردستان لەلایەن میتی تورکیاوە شەهیدکراون و سەیرە بکوژەکان دەستگیرناکرێت”.
نوێنەری پەنابەرانی باکووری کوردستان وتی، “ئەو بکوژانە لە هەرێمی کوردستان رزگاریان دەبێت و لە رێگەی هەولێرەوە دەگەڕێنەوە بۆ تورکیا”.
داواشی کرد کە هێرشەکانی تورکیا بۆ سەر هاوڵاتییانی باکووری کوردستان لەلایەن حکومەتەوە رابگیرێت و وتی، “جێگای شەرمە پێشوازی لە خۆفرۆشان دەکرێت و ئێمەش ئەمڕۆ تەرمی هەڤاڵێکمان لە دهۆکەوە دەنێرینەوە”.
شەوی 17ی ئەم مانگە لەناو فامیلی مۆڵی شاری دهۆک هاوڵاتییەکی باکووری کوردستان تەقەی لێکرا و بەهۆیەوە گیانیلەدەستدا.
