دەستەی کەشناسیی عێراق وادەی کۆتاییهاتنی ئەو شەپۆلی بارانبارینەی ئاشکراکرد کە هەرێمی کوردستان و بەشێک لە پارێزگاکانی عێراقی گرتووەتەوە.
عامر جابری بەڕێوەبەری راگەیاندنی دەستەی کەشناسیی عێراق رایگەیاند، هەرێمی کوردستان و رۆژئاوا و بەغداد تا ئێوارەی سبەینێ پێنجشەممە کاریگەریی ئەم شەپۆلی بارانبارینەیان لەسەر دەمێنێت”.
ئاماژەی بەوەکردووە، “کەشوهەوای ئەمڕۆ چوارشەممە کەشوهەوای هەرێمی کوردستان هەور دەبێت لەگەڵ بارانێکی سووک و مامناوەند بەڵام لە شەودا بە خووڕ دەبێت و رەشەبا لە هەندێک کاتدا دەبێت”.
هەروەها کەشوهەوای رۆژی پێنجشەممە لە هەرێمی کوردستان و باشوور هەور دەبێت، لەگەڵ بارانبارین بە چڕییەکی مامناوەند و روودانی زریان و هەندێک جار رەشەبا و پلەکانی گەرماش چەند پلەیەک لە سەرتاسەری وڵاتدا دادەبەزن.
ئاماژەی بەوەشکرد، رۆژی هەینی کەشوهەوای ناوچەی باکوور نیمچەهەور دەبێت لەگەڵ بارانێکی سووک و هەورەبروسکە لە هەندێک کاتدا، هاوکات پلەکانی گەرما هاوشێوەی رۆژی پێشوو دەبن.
