ئەنجومەنی مامۆستایان و فەرمانبەرانی ناڕازی راگەیەندراوێك بڵاودەكەنەوە و دەڵێن، “پێویستە دەست بەجێ دەست بە دابەشكردنی مووچەی مانگەكانی 10 و 11 بكرێت”.
بەپێی راگەیەندراوێكی ئەنجومەنی سەرتاسەریی مامۆستایان و فەرمانبەرانی ناڕازی كە وێنەیەكی دەست تۆڕی میدیایی ئێستا كەوتووە و تێیدا هاتووە، ئەمڕۆ پاش زیاتر لە 70 رۆژ لە دەست بەسەرداگرتنی مووچەكانمان، دەسەڵات هێشتا خۆی لە ڕاگەیاندنی لیستی مووچەی مانگی 10 دەدزێتەوە و باكی بە چاوەڕوانیی و برسێتی و قەرزاری مووچەخۆران و بێ بازاڕی نییە، لە كاتێكدا دەبوو ئامادەكاری بۆ پێدانی مووچەی مانگی 12 بكات.
دەشڵێن، “لێرەوە رایدەگەیەنین پێویستە دەست بەجێ دەسەڵات دەست بە دابەشكردنی مووچەی مانگەكانی 10 و 11 بكات”.
ئاماژەیان بۆ ئەوەش كردووە، لە كۆتاییشدا هۆشداری بە دەسەڵاتداران دەدەین لە زیاتر دواخستنی مووچەكانمان لە رۆژانی داهاتووشدا فشاری نوێ و كاریگەر و سەرتاسەریی لە بەغداد و هەولێرەوە دەستپێدەكەین و بە كەمتر لە وەرگرتنی مووچەی ئەم سێ مانگە و تەوتینكردنی مووچەكانمان لە رێگای بانكە فیدراڵییەكانەوە ڕازینابین.
