بافڵ جەلال تاڵەبانی، سەرۆكی یەكێتیی نیشتمانیی كوردستان لە دەباشان پێشوازی لە موحسین مەندەلاوی، جێگری یەكەمی سەرۆكی ئەنجومەنی نوێنەرانی عێراق كرد.
لە دیدارێكدا گفتوگۆ لەبارەی هەماهەنگی و هاریكاریی نێوان دامەزراوە دەستوورییەكانی عێراق و بەردەوامی هەوڵەكان كرا بۆ پارێزگاریكردن لە مافەكانی هەموو گەلانی عێراق و راپەڕاندنی ئەركە نەتەوەیی و نیشتمانییەكان.
سەرۆك بافڵ جەلال تاڵەبانی ستایشی رۆڵی ئەرێنیی ئەنجومەنی نوێنەرانی كرد لە بەرامبەر پڕۆژەیاسای بە پارێزگابوونی هەڵەبجە و هیوای خواست كۆدەنگییەكی نیشتمانی سەبارەت بەم پرسە گرنگە بێتە ئاراوە و پشتگیری لێبكرێت”.
لەبارەی خوێندنەوە بۆ پڕۆژەیاسای بودجە و پەسەندكردنی، سەرۆك بافڵ رایگەیاند، “پەسەندكردنی بودجە و گەرەنتیكردنی مافەكانی كورد لە یاساكەدا، هەنگاوێكی گرنگ دەبێت بۆ سەقامگیریی سیاسی و ئابوری لە وڵات و هەڵدانەوەی لاپەڕەیەكی نوێ بۆ هەماهەنگی و كاری پێكەوەیی لەپێناو بونیادنانی داهاتوویەكی گەشتر”.
