وەزارەتی پلاندانانی عێراق پێشبینی كردووە، تا ساڵی 2030 ژمارەی دانیشتووانی عێراق بگاتە نزیكەی 54 ملیۆن كەس.
عەبدولزەهرە هینداوی، وتەبێژەی وەزارەتی پلاندانانی عێراق لە لێدوانێكی ڕۆژنامەوانیدا بە میدیاكانی عێراقی وتووە، “دیارترین ئاڵەنگای كە ڕوبەڕووی عێراق دەبێتەوە لە داهاتوودا، بەرزبوونەوەی ڕێژەی گەشەی دانیشتووانە، ئەوەش لە ئەنجامی زیادبوونی ڕێژەی منداڵخستنەوە”.
وتەبێژی پلاندانانی عێراق ئاشكراشیكردووە، پێشبینی دەكەن ژمارەی دانیشتووانی عێراق تا ساڵی 2030 بگاتە 53 ملیۆن و 297 هەزار كەس.
ئاماژەی بەوەشكردووە، “دیارترین ئامانج كە پێویستە بەدی بێت ئەوەیە ڕێوشوێن و سیاسەتێكی بگیرێتەبەر بۆ ڕێكخستنەوەی ژمارەی دانیشتووان، هەروەها بەرنامەیەكی هۆشیاری بخرێتە گەڕ بە ئاڕاستەی هۆشیاركردنەوەی كۆمەڵگا و ڕێكخستنی ڕێژەی منداڵخستنەوە”.
بەگوێرەی ئامارە نافەرمییەكان، ژمارەی دانیشتووانی عێراق لە ئێستادا 41 ملیۆنی تێپەڕاندووە.
