هونەرمەندێكی میللی لەلایەن كادیرێكی چەكداری پارتییەوە بە توندی پەلاماردەدرێت، وەك ئەوەی لە تۆمارێكی ڤیدیۆییدا دەردەكەوێت و ئاسایشی هەولێریش راستی رووداوەكە دووپاتدەكاتەوە.
بەپێی تۆمارێكی ڤیدیۆیی كە لە تۆڕی كۆمەڵایەتییەكاندا بڵاوبووەتەوە، گەنجێك بەناوی (دانی سویدی) كە هونەرمەندی میللی و دانیشتووی شاری هەولێرە، لەلایەن كەسێكی دیكە بەناوی (كەیفی زرار) بە توندترین شێوە پەلامار دەدرێت.
دواتریش تۆمەتبار قژی تۆمەتلێكراو دەتاشێت.
بەپێی زانیارییەكانی تۆڕی میدیایی ئێستا، تۆمەتبار، كادری چالاكی پارتی دیموكراتی كوردستانە و دانیشتووی هەولێرە، زۆرجار لە بۆنە فەرمی و نافەرمییەكاندا بە چەكەوە دەردەكەوێت.
هەر بەپێی زانیارییەكان، هونەرمەندە میللییەكە پێشتر لە خانەی نەوجەوانان بووە.
لەبارەی رووداوەكەوە عەقید سەباح خدر، وتەبێژی بەڕێوەبەرایەتیی ئاسایشی هەولێر روونكردنەوەیەكی بڵاوكردەوە و رایگەیاند، رووداوەكە لە 14ی ئەم مانگە روویداوە.
بەپێی روونكردنەوەكە كە ئەمڕۆ بڵاوكراوەتەوە، تۆمەتبار (كەیفی سابر ئەحمەد) هەمان رۆژی رووداوەكە دەستگیركراوە و رێکاری یاسایی بەرامبەر گیراوەتەبەر.
