وەزیری دەرەوەی ئێران رایگەیاند، سەرۆکی وڵاتەکەی بانگهێشتنامەیەکی لە مەلیک سەلمان بن عەبدولعەزیز پادشای سعودیەوە پێگەیشتووە بۆ سەردانیکردنی وڵاتەکەی.
حسێن عەبدوللهیان وەزیری دەرەوەی ئێران لە چاوپێکەوتنێکی تەلەفزیۆنیدا رایگەیاند، “ئیبراهیم رەئیسی سەرۆکی ئێران بانگهێشتنامەیەکی لە مەلیک سەلمان پادشای سعودیەوە بەدەستگەیشتووە بەمەبەستی سەردانیکردنی ئەو وڵاتە، لە بەرامبەریشدا رەئیسی داوایەکی هاوشێوەی ئاراستەکردووە”.
ئەمە لە کاتێکدایە دوێنێ دووشەممە وەزیرانی دەرەوەی هەردوو وڵات پەیوەندییەکی تەلەفۆنیان ئەنجامدا و رێککەوتن لە مانگی رەەمەزاندا کۆبوونەوەیەکی دوو قۆڵی ئەنجامبدەن.
لە ماوەکانی رابردووشدا هەردوو وڵات رێکەوتن لەسەر ئاساییکردنەوەی پەیوەندییە دیپلۆماسییەکانی نێوانیان و لە ماوەی دوو مانگدا باڵیۆزخانەکانیان لە وڵاتەکانی یەکتر بکەنەوە.
